Skenario Wayang Padhatan (Gaweanku)

PETRUK MBANGGEL

Dalang ngetokake wayang Petruk, Puntadewa, Werkudara, Kayon, Semar

Sawijining dina ana ing Karang Kedumpel, Petruk lagi ngebayangake lelakone Pandawa sing wis ora karu-karuan eleke. Dheweke ngrasa gething karo Pandawa merga saiki Pandawa wis ora kaya mbiyen maneh lelakone.

ASMARADHANA

Nglembara ing awang-awang

Hangelangut bebasan tanpa tepi

Narabasing mega mendhung

Ngider-ideri jagad ngulandara

Nglembara ngunggahi gunung

Miwah sagung gagahan

Satemah ginawa ngimpi

TABLO                              : Anggambarake pikirane Petruk. (dalang nglakokake wayange Pun-tadewa sing gemedhe amarga wis diarani satria sing paling jujur, banjur nglakokake wayange Werkudara sing gemedhe amarga wis nyekel jimat kalimasada kang dadi juru penyelamat lan pusakane negara Ngamarta.
Nglakokake wayang Puntadewa lan Werkudara makili Pandawa sing wis seneng korupsi Kabeh dilakokake ing jero kayon sing bolong.)

PETRUK                           : “Aku wis ora bisa sabar maneh, saya suwe, saya dinengake, Pandawa saya ora genah. Aku wis ora bisa meneng maneh. Kudu ana sing ndudah Pandawa, aku wis ora seneng babar pisan karo lelakone Pandawa sing saiki. Aku wis ora tahan maneh ana ing kene, aku kudu minggat.” (Petruk lunga banjur ketemu Semar sing lagi arep mulih, ana ing gapura omahe)

SEMAR                             : “Loh, ngger? Raimu kok abang kabeh ki ana apa?”

PETRUK                           : “Boten wonten napa-napa Rama.”

SEMAR                             : “Ora ana apa-apa, ning kok lelakonmu kaya wong sing isih jengkel?Apa kowe ditukari karo adhi-adhimu?”

PETRUK                           : “Boten Rama.”

SEMAR                             : “Yen ora ditukari, banjur kenang apa kowe arep lunga? Wis ayo, dirembug babarengan dhisik ayo.” (Semar nggandeng Petruk bali menyang Karang Kedumpel)

PATET 6 JUGAG

Rem-rem sorete kang hyang Arka Kaeksio….

Pucaing haldaka murub yen janmaha kadhi susasmiteng ing saliring mlaku o….

Lampahing dumadi o….

Gilir gumanti o….

Duka sukaning griya yekti gegadhangan pangesahing diri

Titahing Gusti o….

Kang sarwa dumadi o….

SEMAR                             : “Gong, Bagong, Reng, Gareng. Padha mrenea, Ngger.”

BAGONG                         : “Wonten napa Rama?”

NALA GARENG             : “Nggih Bapa wonten napa?”

SEMAR                             : “Iki, aku arep rembugan karo kowe kabeh, kakangmu Petruk arep lunga saka ngomah. Ketemu aku ana ing dalan, raine wis abang ireng kaya wong isih nesu lan jengkel.Mula tak jak mrene saperlu arep tak jak rembukan.”

NALA GARENG             : “Loh, Truk, arep lunga menyang ngendi?Aku tak melu ya, Truk.”

BAGONG                         : “Aku ya melu yen kowe arep lunga, kang.”

PETRUK                           : “Ora usah padha melu, aku luwih becik lunga dhewe.”

SEMAR                             : “Sek, sek, sajake ana apa ta,ngger? Kok kowe ujug-ujug arep lunga saka omah?Ana masalah apa? Kene dirembug babarengan lan digoleki solusine.”

PETRUK                           : “Kula namung ngrasa sampun boten kiyat kalihan lelakonipun Pandawa, Rama.”

SEMAR                             : “Lelakone Pandawa? Lelakone Pandawa sing kaya kepiye to sing wis ora mbo kuwati, ngger?”

PETRUK                           : “Lelakone Pandawa ingkang sampun boten becik. Lelakone Pandawa ingkang sakmenika remen sanget kaliyan Korupsi, ngginakaken artanipun para tiyang alit kangge kepentingan pribadhi. Lelakone Pandawa ingkang sampun boten trep kaliyan julakanipun.Pandawa sampun padha kesupen kaliyan sinten sejatosipun panjenenganipun sedaya.”

SEMAR                             : “Saka ngendi anggonmu ngerti menawa lelakone Pandawa saiki wis ora becik, ngger?”

PETRUK                           : “Sampun boten wigati malih Rama kula ngertos saking pundi bab menika. Kula namung sampun boten purun malih wonten ing mriki menawi pejabat-pejabatipun negara Ngamarta sampun boten perduli marang tiyang-tiyang alit ingkang wonten ing negara menika.”

SEMAR                             :“Panemumu pancen becik, ngger. Ning yen kowe arep lunga saka ngomah, tujuanmu kuwi arep menyang ngendi?Dirampungake ana kene wae, ora usah nganggo lunga-lunga saka omah barang.”

PETRUK                           : “Miturut panemunipun kula, bab menika sampun boten saged dipunpungkasi amargi pajabat-pejabat menika sampun boten perduli kaliyan aspirasi rakyatipun piyambak. Kula badhe tetep tindak saking mriki Rama.”

BAGONG                         : “Aja lunga ta, kang. Yen kowe lunga mengko sing dadi ece-ecenan sapa?” (Bagong nggondeli tangane Petru karo sesengukan)

GARENG                         : “Iya, Truk. Sing ngancani aku turu mengko sapa yen kowe lunga? Aja lunga ta.” (Nyikep Petruk)

SEMAR                             : “Apa kowe ora mesake karo adhi-adhimu iki, ngger.”

PETRUK                           : “Kula tetep badhe tindak, Rama. Boten wonten sing saged menggak kula sakmenika. Wis, Gong, Reng, kowe ora usah menggak menggak aku lunga, iki wis dadi niatanku, niatanku iki wis wulet. Dadi aku tetep bakale lunga.Kula pamit, Rama.”(Petruk mlayu lungga ninggalake Semar, Bagong lan Gareng)

SEMAR                             : “Loh, ngger…”                                                                                      

GARENG                         : “Petruk…. Aku melu....” (arep mlayu ning digondeli Semar)

BAGONG                         : “Kakang Petruk aja lunga….” (Bagong nangis nyikep Semar, banjur Gareng uga melu nyikep)

SEMAR                             : “Padha sing sabar ya, ngger.” (Ngrangkul Bagong lan Gareng)

MASKUMAMBANG

Kembeng-kembeng kumembeng waspa dres mijil

Eling lan narima lelaku labuh mring mami

Pupusa nilar kawula

Dalang ngetokake wayang Petruk, Petruk Ratu, Kayon, Ratu-Ratu negara cilik cacahe 3, lan wayang wadya bala prajurit, wayang kanggo anggambarake Jimat Kalimasada.

Petruk kang wis gething mau banjur ora keoyak playune dening Semar. Ing sawijining alas, Petruk duweni niatan ala.

ADA-ADA GREGET SAUT PATET 6

Remeng remu soroting hyang Patangga Pati

Himawan seta hana wengi

PETRUK                           : “Aku pengen gawe Pandawa kocar-kacir. Ha, arep tak jupuk Jimat Kalimasada, banjur sawise kuwi, aku arep ngedeg negara anyar. Ngumpulake praja kang akeh kanggonglawan Pandawa.Saiki aku arep menyang Ngamarta, jupuk Jimat Kalimasada kang dibangga-banggaake dening Pandawa.”

TABLO                              : (Pertuk lunga menyang Ngamarta, jupuk Jimat Kalimasada meneng-meneng lan ora konangan. Banjur anjelma dadi ratu Sindhung Aliwarwar)

PETRUK                           : “Hahaha, saiki aku bisa menang klawan sapa wae. Pandawa, ntenana tekaku maring negaramu, ning saiki aku tak madeg negara anyar lanngumpulake wadya bala saka ndudah negara-negara cilik. Hahaha.”(Petruk lunga.)

TABLO                             : Petruk takan ana ing negara Toyamarta lan ketemu karo Prabu Prakonda.

TEMBANG TANTANGAN PATET 6

Kridu mawur mangawur-awur wurahan

Tengaraning ajurit gung maguru gangsa

Teteg kadya butula

Wur panjriting turanggesti

Rekatak ingkang

Dwaja lelabuh sebit

P. PRAKONDA               : “Sapa kowe, lan arep apa menyang negaraku?

PETRUK                           : “Heh ratu aning negara Toyamarta, kowe Prabu Prakonda, aku Prabu Sundhung Aliwarwar arep gawe negaramu dadi negara jajahan Cakratirta, tunduka marang aku yen isih kepengin gawe urip.

P. PRAKONDA               : “Ora sudi aku tunduk marang kowe, heh Prabu Sindhung Aliwarwar.

PETRUK                           : “Yen ngono, tandingana aku. Menawane kowe kalah, kowe kudu nyembah dlamakane Prabu Sindhung Aliwarwar iki.

P. PRAKONDA               : “Ora wedi, ayo majua mrene.”

TABLO                              : Nggambarake Petruk klawan ratu saka negara Toyamarta yaiku Prabu Prakonda.

P. PRAKONDA               : (Mlayu)

PETRUK                           : “Aja mlayu kowe, narendra ing Toyamarta, heh Prabu Prakonda!” (ngoyak Prabu Prakonda)

PETRUK                           : (Ketemu maneh) “Wahahaha, arep lunga menyang ngendi maneh kowe? Ngakua kalah, lan nyembah dlamakanku.”

P. PRAKONDA               : “Iya, aku ngaku kalah, kowe dudu tandinganku.” (nyembah dlamakane Prabu Sindhung Aliwarwar)

PETRUK                           : “Wahahaha, bagus. Saiki aku arep nggempur negara-negara cilik liyane, ayo Prabu Prakonda, gawanen kabeh prajuritmu, melua aku nglawan narendra saka negara Marutamanda, Prabu Tanggulangin.”

P. PRAKONDA               : “Sendika dawuh Gusti Prabu.”

TABLO                             : Petruk Ratu mara menyang negara Marutamanda ketemu Prabu Tanggulangin.Lan perang maneh.

PERTUK                           : (bar tarung nyekel gulune Prabu Tanggulangin) “Ngakua kalah wae klawan aku heh kowe Prabu Tanggulangin saka negara Marutamanda!”

P. TANGGULANGIN     : “Iya, aku ngaku kalah, aku memang dudu tandinganmu. Gawea negaraku dadi negara jajahan Cakratirta.

PETRUK                           : “Wahahaha, apik. Ayo gawana prajuritmu, melua aku ndedah negara cilik liyane”

TABLO                             : mara menyang negara Gua Siluman klawan narendrane sing jenenge Prabu Bumipadha.

PETRUK                           : “Wis ngakua kalah wae ketimbang kowe tatu, ha Prabu Bumipadha saka negara Guwa Siluman?”

P. BUMUPADHA            : “Nggih, nggih pun kula ngaku kalah mawon”

TABLO                             : Sawise kuwi Petruk sing jenenge dadi Prabu Sindhung Aliwarwarbali menyang negara Cakratirta.

Dalang nyiapke wayang Petruk Ratu, Kayon, Ratu-Ratu negara cilik 3, Janaka, Puntadewa, Nakula lan Sadewa.

Wadya bala saka negara anyar sing diarani negara Cakratirta sing Ratune diarani Sindhung Aliwarwar wis disiapake kanggo anggempur Ngamarta. Ing negara Cakratirta.

(Petruk melbu, nari-nari sedela.Banjur ratu-ratu negara cilik melbu.)

ADA-ADA JUGRAG PATET 9

Dasare mangsa ketiga purnameng gegana

Riris harda salah mangsa adat sagung hamong tani

Jumangkah samya ngayati o…

Yasa bebetengan Handeder wiji minangka tumibaning mangsa sanga

PETRUK                           : “Heh sumitraku kabeh, utamane kowe, heh Prabu Tanggulangin.”

P. TANGGULANGIN     : “Wonten dawuh tinimbalan sang Prabu Sindhu Aliwarwar?”

ADA-ADA PATET 6

Kadangmu warahen ben becik

Becik hamendhema baris

Baris kang prayekna o….

Aywa saranta sang Dwarawati

Tan iku awak pandawa

PETRUK                           : “Kowe dadia Patih ana ing negaraku iki, negara Cakratirta.”

P. TANGGULANGIN     : “Nggih gusti Prabu, nuwun.”

PETRUK                           : “Saiki kumpulna kabeh para rerean. Kowe kabeh hei, Patih Tang-gulangin, Prabu Prakonda lan Prabu Bumipadha.Siapake kabeh prajuritmu, bareng-bareng nggempur negara Ngamarta.”

P. BUMIPADHA             : “Wonten menapa kaliyan praja Ngamarta gusti Prabu? Wonten menapa kok panjenengan badhe anggempur negara Ngamarta?”

PETRUK                           : “Kowe ngerti retune sing jenenge Puntadewa?”

P. BUMIPADHA             : “Nggih ngertos gusti, wonten menapa?”

PETRUK                           : “Aku mung arep ngebuktiake kandhane wong-wong sing jare getihe Prabu Puntadewa kuwi putih. Aku rung ngandel menawane aku durung ngebuktiake dhewe, tananan apa ora getihe kuwi putih. Patih Tanggulangin, budhal dina iki?”

P. TANGGULANGIN     : “Sendika ngestuaken dawuh, gusti.”

ADA-ADA PATET 9

Bumi gonjang-ganjing langit kelap-kelap

Katon lir kinencang alis prisang maleh gandrung o…

TABLO                             : prajurit sing sapirang-pirang padha dibudhalake menyang negara Ngamarta. Banjur tekan lan Petruk Ratu mungsuh Janaka, Nakula, Sadewa, ning Pandawa kalah.

JANAKA                          : “Sapa kowe, saka ngendi asalmu?”

PETRUK RATU               : “Aku Prabu Sindhung Aliwarwar, saka negara Cakratirta.”

SADEWA                         : “Arep ngapa gawa wadya bala menyang mrene?”

PETRUK RATU               : “Aku arep nggempur negara Ngamarta, arep tak tugel gulune para Pandawa.”

NAKULA                         : “Kurang ajar, kok kira sapa kowe, wani-waninearep nugel gulune para Pandawa, he?”

PETRUK RATU               : “Ora usah kakehan takon, majua mrene!”

TABLO                             : Petruk Ratu mungsuh Janaka, Nakula lan Sadewa ning Pandawa kalah. Banjur Petruk Ratu nggoleki Prabu Puntadewa.

PETRUK RATU               : “Lah iki rak ratune.”

P. PUNTADEWA             : “Wani ndedah negarane Pandawa lan ngalahake Janaka, Sadewa karo Nakula brarti awakmu kuwi dudu tandingan sing bisa diremehake, majua kene, tandingana aku heh Prabu Sindhung Aliwarwar!”

PETRUK RATU               : “Dengan senang hati. Wahahaha.Arep tak pecah-pecah ndasmu!”

TABLO                             : Petruk mungsuh Prabu Puntadewa, padha wae Petruk bisa menang.

PETRUK RATU               : “Wahahahaha, mung ngono iku kekuatane narendra aning Ngamarta,

Dalang nyiapake wayange Petruk Ratu lan Gendruwaraja.

Sawise bisangalahke Pandawa Petruk ora banjur lunga nanging malah pengen lunga menyang Dwarawati kanggo nggempur ngara iku. Nanging ning tengah dalan, dheweke dicegat karo Gendruwaraja.

ADA-ADA PATET MANYURA

Meh rahina sumubang hyang Haruna

Kadi nitraning oga rapuh sabdaning kukila

Ring kanigara saketer o….

Ni kidung ning akung

Lwir wuwusing winipanca

Pepetak ing ayamwana ing pagagan

Mrak hanguwuh bremara ngrabasa
kusuma ring parahasyan arum

PETRUK RATU               : “Sapa kowe? Ngadang-ngadangi dalanku, minggir!”

GENDRUWARAJA        : “Ora perlu ngerti sapa aku, sapa kowe kok wani-wanine nggawe kisruh ana ing kene lan ngumpetake Jimat Kalimasada ana ing gelunganmu?”

PETRUK RATU               : “Aku Prabu Sindhung Aliwarwar, ratu ana ing negara Cakratirta. Dudu urusanmu, minggira wae!”

GENDRUWARAJA        : “Negara anyar apa piye, ora tau krungu, menawane aku ora gelem minggir, kowe arep apa?”

PETRUK RATU               : “Ora usah kakehan bacot, bakale tak tugel gulumu!”

TABLO                             : Petruk nyerang Gendruwaraja ning diinggati banjur padha tukaran. Wis ngrasa kalah Petruk ngetokake gamane. Gendruwaraja kenal karo gamanemau.

GENDRUWARAJA        : “Owalah dalah Truk, Truk. Jebul kowe ta sing gawe geger. Gaman saka aku kok ya mbok balikake marang aku, ta. Wis, tak bari wae lah.” (Gendruwaraja mbalikake gamane mau)

TABLO                             : Petruk kena gamane dhewe, banjur malih dadi wujude sing asli.

Dalang nyiapake wayange Petruk, Prabu Puntadewa, Janaka, Nakula, Sadewa, Semar, Gendruwaraja, Werkudara.

Sawise Petruk malih dadi wujude sing asli dheweke mbalikake Jimat Kalimasada.

ADA-ADA MENYURA JUGAG PANDAWA 5

Mulad mara sang harjuna hesmu nira kamanungsan

Kasrepan tingkahireng mungsungo…

SEMAR                             : “Kenang apa ta, ngger kok ya bisa-bisane awakmu duweni panemu sing kaya ngene iki.”

PETRUK                           : “Gusti kula nyuwun ngapura, kula sampun boten betah menawi panjenengan lan para rayi-rayi panjenengan kurupsi lan boten perduli marang rakyat ingkang alit malih. Menika Jimat Kalimasada kula kundhuraken dateng penjenengan.”

P. PUNTADEWA             : “Iya, ora papa. Aku lan adhi-adhiku ya njaluk ngapura ya, awit wis ora tau merhatiake rakyat cilik maneh. Sing penting saiki Jimat Kalimasada wis bali maneh menyang negara Ngamarta.”

GENDRUWARAJA        : “Wis, saiki aku njaluk idin ya kakang Semar, Petruk arep tak jak lunga marang alam perjinan kanggo pertapan kungkum satus dina.”

SEMAR                             : “Ya kana tak weheni idin.”

TABLO                             : Petruk digawa lunga dening Gendruwaraja

GENDHING

TAMAT